काठमाडौं,
फागुन १६ ।
नइ एकेडेमीले सुविख्यात नाटककार, आख्यानकार तथा कवि विजय मल्लको शताब्दी महोत्सव शनिबार काठमाडौंमा विविध कार्यक्रमका साथ सम्पन्न गरेको छ । महोत्सवका अवसरमा विजय मल्लका सिर्जनात्मक कृतिको संवर्धन तथा प्रवर्द्धनमा उल्लेखनीय योगदान पुर्याउने ४६ जना प्राज्ञ, साहित्यकार तथा नाट्य-चलचित्रकर्मीलाई ‘विजय मल्ल नइ शताब्दी पुरस्कार’ र ‘विजय मल्ल नइ शताब्दी पदक’बाट विभूषित गरिएको थियो ।
कार्यक्रममा नइ एकेडेमीका कुलपति इन्दिरा प्रसाईले प्रमुख अतिथि महासमालोचक प्रा.डा. वासुदेव त्रिपाठीलाई ‘विजय मल्ल नइ शताब्दी पदक’ प्रदान गर्नुभयो । त्यस्तै, प्रमुख अतिथि त्रिपाठीले विजय मल्लका सिर्जनात्मक योगदानमाथि अध्ययन तथा विद्यावारिधि अनुसन्धानमा समर्पित रही प्राज्ञिक योगदान पुर्याएका नेपाल र भारतका सात जना प्राज्ञलाई जनही २५-२५ हजार रुपैयाँ राशिसहित ‘विजय मल्ल नइ शताब्दी पुरस्कार’ प्रदान गर्नुभयो ।
पुरस्कृत हुने प्राज्ञहरूमा डा. रमा शिवाकोटी, डा. साधना पन्त ‘प्रतीक्षा’, डा. लेखराज खतिवडा, डा. गोपालप्रसाद गैरे, डा. भगवानचन्द्र ज्ञवाली, डा. नित्यानन्द खतिवडा र प्रा.डा. कृष्णराज घतानी रहनुभएको छ ।
यसैगरी विजय मल्लका कृतिमा आधारित नाट्यमञ्चन तथा चलचित्र निर्माणमा योगदान पुर्याउने ३८ जना स्रष्टा तथा कलाकारलाई ‘विजय मल्ल नइ शताब्दी पदक’ समर्पण गरिएको थियो । पदकबाट विभूषित हुनेहरूमा अंशुमाला शाही, कृष्ण मल्ल, प्रा. केशव सुवेदी, गौतमरत्न तुलाधर, चन्द्रमाला शर्मा, चैत्यदेवी, टीका पहारी, प्रा.डा. दयाराम श्रेष्ठ, डा. दुर्गाबहादुर घर्तीमगर, प्रा.डा. देवीप्रसाद गौतम, प्रा.डा. देवीप्रसाद सुवेदी, नगीना जोशी, नगेन्द्र थापा, नारायणदेवी प्रधान, नीर शाह, प्रेमबहादुर बस्नेत, भुवन केसी, मदनदास श्रेष्ठ, प्रा.डा. महादेव अवस्थी, मुरलीधर, मोतीशोभा श्रेष्ठ, रवीन्द्र खड्का, राधेश्याम प्रधान, रीतादेवी प्रधान, रेणु श्रेष्ठ, लक्ष्मी श्रेष्ठ, लक्ष्मीनाथ शर्मा, वसन्त श्रेष्ठ, शकुन्तला शर्मा, शिव श्रेष्ठ, शैलेन्द्र सिम्खडा, सन्तोष पन्त, सुवर्ण क्षत्री, सुषमा शाही, सूर्यमाला शर्मा, हरिबहादुर थापा, हरिहर शर्मा र प्रा.डा. हेमचन्द्र नेपाल रहनुभएको थियो ।
नइ एकेडेमीका कुलपति इन्दिरा प्रसाईको सभापतित्वमा सम्पन्न समारोहमा प्रमुख अतिथि प्रा.डा. वासुदेव त्रिपाठीसहित प्रा.डा. दयाराम श्रेष्ठ, प्रा.डा. कृष्णराज घतानी, चैत्यदेवी, मदनदास श्रेष्ठ, लक्ष्मीनाथ शर्मा, हरिहर शर्मा तथा सदस्यसचिव नरेन्द्रराज प्रसाईले स्रष्टा विजय मल्लको साहित्यिक योगदान र व्यक्तित्वबारे चर्चा गर्नुभएको थियो ।
