काठमाडौं,
भाद्र १३ ।
कवि तथा कथाकार रञ्जन घिमिरेको नवीनतम् लघुकथासङ्ग्रह सार्वजनिक भएको छ । आफ्नी ममतामयी आमाको ८० औँ जन्मदिनका अवसरमा स्रष्टा घिमिरेले उपहारस्वरुप आमालाई ‘सम्मोहन’ नामक लघुकथासङ्ग्रह अर्पण गर्नुभएको हो । आफ्नो जन्मदिनमा स्रष्टा घिमिरेकी आमाले छोरो रञ्जनको कृतिका रूपमा तेस्रो र पहिलो लघुकथासङ्ग्रह ‘सम्मोहन’ विमोचन गर्नुका साथै सिर्जनायात्रा निरन्तर अगाडि बढ्न छोरोलाई आशीर्वादसमेत दिनुभयो ।
वि.सं. २०४३ साल असोज ७ गते गोरखा जिल्लाको मकैसिङमा जन्मिनुका रञ्जनका यसअघि ‘मूच्र्छित स्वरहरू’ (कवितासङ्ग्रह, २०७१), ‘घिमिरे वंशावली’ (अनुसन्धानमूलक कृति, २०७७) र ‘समाजसेवी होमनाथ घिमिरे’ (२०७६) नामक संस्मरणात्मक ग्रन्थ (सम्पादन) प्रकाशित भइसकेका छन् । ‘सम्मोहन’भित्र समसामियक विषयवस्तुमा लेखिएका ३७ ओटा लघुकथाहरू समाविष्ट छन् ।
लघकथाकृतिबारे नेपाल प्रज्ञा–प्रतिष्ठानका कुलपति गङ्गाप्रसाद उप्रेती भन्नुहुन्छ- ‘समसामयिक जीवनमा देखापरेका अनेकौँ विकृति, जीवन–मूल्यको गिर्दो अवस्था, उपभोक्ता संस्कृतिले जन्माएका अमानवीय तथा सामाजिक संवेदनाहीन प्रवृत्ति र त्यस्ता प्रवृत्तिले अस्तव्यस्त पारेको वर्तमान समयका पलपलका घटनाहरूलाई मूल विषयवस्तु बनाएर लघुकथाकार रञ्जन घिमिरेले लघुकथा लेख्नुभएको छ । विषयवस्तुको सङ्क्षिप्तता, आकारको लघुता तथा भाषिक सरलताले लघुकथालाई प्रभावकारी बनाउने कुरा कथाकार घिमिरेले राम्ररी बुझनुभएको छ र यसैकारण उहाँका यस सङ्ग्रहमा परेका लघुकथाहरू प्रभावकारी भएका छन् ।’
यसैगरी साहित्यकार गोपाल अश्क समसामयिक विषयवस्तुलाई आधार बनाएर घिमिरेले सिर्जना गरेका सबै लघकथा पठनीय, सम्प्रेषणीय र चोटिला भएको दाबी गर्नुहुन्छ । समालोचक डा. हरिप्रसाद सिलवालको विचारमा कृतिकार आफ्नो कृतिमा जीवनका अमिला–तिता पक्षलाई सिन्कीझैँ खाँद्न र वर्तमान समाजलाई सही दिशानिर्देशन गर्न सफल बन्नुभएको छ ।
कृतिकार घिमिरेले लघुकथाकृति ‘सम्मोहन’भित्र आफूले पचासको अन्त्यदेखि हालसम्म सिर्जना गरेका ३७ ओटा लघुकथाहरू सङ्ग्रहित गरेको बताउनुभयो । उहाँले भन्नुभयो– ‘विश्वव्यापी महामारी कोरोना भाइरस (कोभिड-१९)ले समाजलाई नै होल्ड गराइरहेका बेला स्रष्टाहरू निराशा भएर बसिरहेका छैनन् है भन्ने सन्देश दिनका लागि पनि मैले लकडाउनकै समयमा यो कृति तयार पारी सार्वजनिक गरेको हुँ ।’
