काठमाडौं,
ज्येष्ठ १० ।
व्यवस्थापिका संसदको बैठक आज ११ बजेका लागि बोलाइएको भए पनि बस्न सकेन । व्यवस्थापिका संसादको बैठक भोलिसम्मको लागि स्थगित भएको छ । प्रमुख प्रतिपक्षी दल नेकपा एमालेसँग सहमति हुन नसकेपनछि संसद बैठक भोलिसम्मको लागि स्थगित गरिएको हो ।
सूचना टासगरि बैठक भोलि अपरान्ह ४ बजेसम्मको लागि स्थगित भएको छ । भोलि राष्ट्रपति विद्यादेवी भण्डारीले व्यवस्थापिका संसदमा चालू आर्थिक वर्षको सरकारका नीति तथा कार्यक्रम प्रस्तुत गर्ने कार्यक्रम छ ।
सरकारले सोमबार बसेको बैठकबाट मधेसका विभिन्न जिल्लामा २२ स्थानीय तह थप गरेपछि एमालेले विरोध विरोध गर्दै आएको छ । सोहि निर्णयको विरोधमा संसद अवरुद्ध पार्ने भएपछि संसद बैठक स्थगित हुँदै आएको हो । मंगलबारको लागि बोलाइएको बैठक तीन पटकसम्म सार्दै आजसम्मको लागि स्थगित गरिएको थियो ।
दलहरुबीच कुनै छलफलसमेत हुन नसकेको र एमालेले अवरोध गर्ने नै भएपछि भोलि ४ बजेसम्मको लागि बैठक स्थगित गरिएको बताइएको छ । यो बीचमा संसदको कारबाही चलाउनका लागि सत्तारुढ दलले एमालेसँग धनीभूत छलफल गर्ने तयारी गरेको छ ।
यसैबीच संसद बैठक सरिरहँदा प्रधानमन्त्री प्रचण्डले पनि संसदमा विशेष सम्बोधन गर्न पाएका छैनन् । विशेष सम्बोधन गरेर राजीनामा दिने तयारीमा प्रचण्ड छन् ।
