काठमाडौं
असार २ ।
विगत डेढ दशक भन्दा बढी समयदेखि नेपाली शिक्षाक्षेत्रमा संलग्न रही मुलुकको शैक्षिक क्षेत्रमा पुर्याएको योगदानसँगै नेपालको शिक्षा क्षेत्रसँग जोडिएका विभिन्न क्रियाकलाप र अन्य शैक्षिक संस्थासँग समेत आवद्ध रहँदै हाल ट्रस्ट एण्ड कियर मन्टेस्वरीको प्रतिनिधित्व गर्दै फाउन्डर प्रिन्सिपलसमेत रहनुभएकी दीपा थापा ‘पिम नेपाल शिक्षा सम्मान २०८२’बाट सम्मानित हुनुभएको छ ।
काठमाडौंमा आयोजित नवौं संस्करणको ‘राष्ट्रिय समावेशी म्युजिक अवार्ड (निम अवार्ड) २०२६’ मा उहाँ उक्त सम्मानबाट सम्मानित हुनुभएको हो ।
नेपाली शैक्षिक जगतको संरक्षण, सम्वद्र्धन र विकासका लागि उहाँले हालसम्म निर्वाह गर्नुभएको भूमिका र पुर्याएको योगदानको उच्च मूल्यांकन गर्दै उक्त सम्मान गरिएको आयोजकले जनाएको छ ।
कार्यक्रममा बरिष्ठ अभिनेत्रीत्रय बसुन्धरा भुसाल, भुवन चन्द, चैतदेवी, चलचित्र विकास बोर्डका अध्यक्ष दिनेश डिसी, दिग्गज कलाकार मोहन निरौला लगायतले सम्मानित सम्पूर्णलाई फूलमाला, खादा र सम्मान पत्रले सम्मान गर्नुभएको थियो ।
पावर इन्टरनेशनल मिडिया नेपाल (पिम नेपाल)को आयोजना र इरा प्रोडक्सन प्रालिको ब्यवस्थापन रहेको कार्यक्रममा गीतकार सुरेश घिमिरे ‘बिशिष्ट गीतकार सम्मान २०८२’, शिखर जंगम श्रेष्ठ ‘संगीत पत्रकारिता पुरस्कार २०८२’, कृष्णदेव रुपाखेती निर्देशक ‘दीर्घसाधाना सम्मान २०८२’, महेशराज थापा ‘सामाजिक ब्यक्तित्व सम्मान २०८२’, विनोद देवकोटा ‘पत्रकारिता सम्मान २०८२’, छायांकार सालिकराम दुलाल ‘कला सम्मान २०८२’, दीपा थापा ‘पिम’ नेपाल शिक्षा सम्मान २०८२’, सचिन भट्टराई ‘युवा कलाकारिता सम्मान २०८२’, रणजित कुमार झा ‘पिम नेपाल संगीतकर्मी सम्मान २०८२’, सुनिता कुबँर ‘पिम नेपाल कला सम्मान २०८२’ बाट सम्मानित हुनुभएको थियो ।
कार्यक्रममा कलाकार संघका अध्यक्ष उत्तम केसी, बरिष्ठ कलाकार रबिन्द्र खड्का, बरिष्ठ संगीतकार राजु सिंह, निर्देशक जनकदीप पराजुली, गायक शिव परियार, बरिष्ठ गायक सिताराम पोखरेललगायत थुप्रै कलाकर्मीको सहभागीता रहेको थियो ।
माधवराज खरेल अध्यक्ष, कमला जोशी संयोजक रहेको कार्यक्रमको निर्देशक सनम कठायत रहनुभएको थियो । अवार्डको जुरी सदस्यमा सन्तोष श्रेष्ठ, जुगल डंगोल, विजयरत्न तुलाधर, साहस शाक्य, प्रकाश मिश्रा, रमेश दाहाल र आशा भुसाल हुनुहुन्थ्यो ।
विविध भाषाका गीतसंगीतलाई एउटै मञ्चमा सम्मान गर्ने उद्देश्यसहित आयोजना आएको ‘राष्ट्रिय समावेशी म्युजिक अवार्ड (निम अवार्ड) २०२६’ मा बिभिन्न ३० विधासहित जुरी अवार्ड बाँडिएको थियो ।
