काठमाडौं,
वैशाख २३ ।
चलचित्र ‘लालीबजार’ प्रदर्शन गर्ने बाटो खुलेको छ । बुधबार उच्च अदालत पाटनका न्यायाधीशद्वय खडानन्द तिवारी र नेत्रप्रसाद आचार्यको संयुक्त इजलासले यसअघि ‘लालीबजार’ को प्रदर्शनमा रोक लगाउँदै दिएको अल्पकालीन अन्तरिम आदेशलाई निरन्तरता दिन अस्वीकार गरेको छ । यस आदेशसँगै यो चलचित्र यही शुक्रबार, अर्थात् वैशाख २५ गतेदेखि प्रदर्शनमा आउने निर्माण कम्पनी षट्कोण आर्ट्सले जनाएको छ ।
चलचित्रका निर्माता म्याक्स दीपेश खत्रीले सम्मानित अदालतको आदेशसँगै चलचित्र यही शुक्रबारदेखि प्रदर्शन हुने जानकारी दिनुभयो । ‘हामीले कुनै पनि समुदाय वा वर्गको भावनामा ठेस पुग्ने गरी फिल्म तयार गरेका थिएनौँ । हामीले आमा र छोरीको कथामा फिल्म निर्माण गरेका छौँ । फिल्मले छोरीका लागि आमाले गर्ने संघर्षको कथा प्रस्तुत गर्छ,’ उहाँले भन्नुभयो ।
निर्देशक तथा लेखक यम थापाले चलचित्र हेरेपछि कुनै पनि समुदायको भावना आहत नहुने विश्वास व्यक्त गर्नुभयो । उहाँले भन्नुभयो, ‘अहिले अनुमानका भरमा फिल्मलाई लिएर विभिन्न अडकलबाजी भएका छन्। फिल्म हेरेपछि कसैको चित्त दुख्दैन भन्नेमा म विश्वस्त छु ।’
चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, प्रदीप ढकाल, आशा पौडेल, गोविन्द सुनार, आभा आर्याल, तारा शर्मा, रमेश वादी, सरस्वती अधिकारी, जानकी कडायत, निश्चल पन्थी, विरवल चौधरी लगायतका कलाकारको अभिनय छ ।
यसै चलचित्रमार्फत विशाल देवकोटा र प्रशंसा सुवेदीले डेब्यु गर्दैहुनुहुन्छ । विशाल थियटरमा अभिनेता तथा निर्देशकका रूपमा सक्रिय कलाकार हुनुहुन्छ भने प्रशंसा जेन-जी पुस्ताकी उदीयमान अभिनेत्रीका रूपमा परिचित हुनुहुन्छ । निर्देशक यम थापाको कथा तथा निर्देशनमा तयार भएको चलचित्र ‘लालीबजार’ को पटकथा र संवाद निर्देशक थापा र प्रदीप भट्टराईले संयुक्त रूपमा तयार गर्नुभएको हो ।
चलचित्रमा कार्यकारी निर्माता प्रदीप भट्टराई रहनुभएको छ भने म्याक्स दीपेश खत्री र रवीन्द्रसिंह बानियाँ निर्माता रहनुभएको छ ।
चलचित्रका क्रिएटिभ निर्देशक जेबी रुवाली, द्वन्द्व निर्देशक सम्राट बस्नेत, छायांकन निर्देशक सुशन प्रजापती, सम्पादक मित्रदेव गुरुङ, प्रोडक्सन हेड रुपकप्रताप अधिकारी, कलरिस्ट रेनिश फागो, भिएफएक्स समिर श्रेष्ठ र सत्यम राना, ब्याकग्राउन्ड म्युजिक तथा मिक्सिङ रोहित शाक्य र शैलेश श्रेष्ठ, कला निर्देशक उमेश चौधरी, पब्लिसिटी डिजाइनर रोयल भीमसेन (ट्राइडेन्ट), मिडिया संयोजक सिपी जैशी, कस्ट्युम डिजाइनर तथा स्टाइलिस्ट जानकी कडायत, मेकअप आर्टिस्ट काव्या थापा तथा सङ्गीतकार प्रकाश सपूत, खेम सेन्चुरी र जयन जे वाइवाको छ ।
