काठमाडौं,
साउन ६ ।
सौन्दर्य प्रतियोगिता मिसेस् नेपाल २०२६ को आवेदन खुला गरिएको छ । बुधवार आयोजित पत्रकार सम्मेलनमा आयोजक रिबन इन्टरटेनमेन्टले प्रतियोगिताको आवेदन प्रक्रिया प्रारम्भ भएको जानकारी दिएको हो । आयोजकका अनुसार आवेदन खल्ती मार्फत वा रिबन इन्टरटेनमेन्टको वेबसाइटमा रहेको फारममार्फत भर्न सकिनेछ ।
पत्रकार सम्मेलनमा रिबन इन्टरटेनमेन्टका अध्यक्ष निशुकान्त झाले यस वर्ष प्रतियोगितामा नयाँ शीर्षक ‘मिसेस् नेपाल कस्मो’ थपिएको जानकारी दिनुभयो । उहाँले भन्नुभयो, ‘यसको अडिसन साउन २३ गते छ भने ग्रान्ड फिनाले कात्तिक १४ गते हुनेछ । यो वर्षबाट हामीले एउटा नयाँ टाइटल थपेका छौं, त्यो हो मिसेस् नेपाल कस्मो । एउटै स्टेजमा मिसेस् नेपाल वर्ल्ड, मिसेस् नेपाल इन्टरनेसनल र मिसेस् नेपाल कस्मो गरी तीनवटा टाइटल रहनेछन् । साथै, एमएस् नेपाल इन्टरनेसनल भन्ने छुट्टै विधा पनि छ, जुन अविवाहित वा एकल महिलाका लागि छुट्याइएको हो ।’ झाका अनुसार प्रतियोगितामा २१ देखि ५० वर्ष उमेर समूहका महिलाले सहभागी हुन सक्नेछन् । उचाइ र तौलको कुनै मापदण्ड नरहेको उहाँले बताउनुभयो ।
उहाँले भन्नुभयो, ‘विवाहित, सम्बन्धविच्छेद भएका तथा एकल महिला सबैले सहभागिता जनाउन सक्नुहुन्छ । तर, एकपटक विवाह भएको हुनुपर्छ । नेपाली नागरिक विदेशमा हुनुहुन्छ भने पनि अनलाइन अडिसनमार्फत सहभागी हुन सक्नुहुन्छ । काठमाडौं बाहिरका लागि पोखरा, इटहरी, विराटनगर लगायतका स्थानमा अडिसन सञ्चालन गर्छौं । छनोट भएका सहभागीलाई ४५ दिने प्रशिक्षणका साथै राष्ट्रिय तथा अन्तर्राष्ट्रियस्तरका तालिम पनि उपलब्ध गराइन्छ । यो इभेन्ट हाम्रो लागि केवल कार्यक्रम होइन, भावना हो। धेरै मेहनतपछिको उपज हो ।’
मिसेस् नेपाल वर्ल्ड २०२५ की विजेता रक्षा पन्तले प्रतियोगिताले विवाहित महिलामा आत्मविश्वास विकास गर्न महत्वपूर्ण भूमिका खेलेको बताउनुभयो । ‘नेपालमा विवाहित महिलाका लागि पनि एउटा प्रतिष्ठित प्रतियोगिता छ । यहाँ सौन्दर्य मात्र होइन, आत्मविश्वास पनि निर्माण हुन्छ । एक-दुई वर्षअघि म मिडियासामु आएर बोल्न सक्छु भन्ने पनि सोचेकी थिइनँ । तर, आज मिसेस् नेपाल वर्ल्डले मलाई यस्तो प्लेटफर्म र आत्मविश्वास दिएको छ । म आफूलाई निकै गर्व महसुस गर्छु,’ उहाँले भन्नुभयो ।
पन्तले नेपाली समाजमा विवाहित महिलालाई जिम्मेवारीको घेराले सीमित गर्ने सोच अझै कायम रहेको उल्लेख गर्दै महिलाहरूलाई आफ्ना सपना नत्याग्न आग्रह गरिन् । ‘अहिले पनि ब्युटी प्याजेन्टमा जाँदा नाक काटिन्छ भन्ने सोच समाजमा छ । तर, विवाहित महिलालाई कुनै कुराले रोक्न सक्दैन भन्नेमा म विश्वास गर्छु । क्षमता छ भने मिसेस् नेपाल वल्र्डजस्ता प्लेटफर्म मात्र होइन, आफ्ना अन्य इच्छा र आकांक्षाहरू पनि नमार्नुहोस् । इच्छुक सबै विवाहित महिलाले सहभागिता जनाउनुहोस्, तपाईंले आफ्नै जीवनमा सकारात्मक परिवर्तन महसुस गर्नुहुनेछ’, उहाँले भन्नुभयो ।
